Departamenti i Punës Sociale në Universitetin e Prishtinës, i themeluar në vitin 2012, është institucioni i vetëm arsimor në Kosovë që ofron programin e studimeve Bachelor në Punë Sociale. Me një numër të konsiderueshëm aplikantësh, departamenti po dëshmohet si një mundësi e rëndësishme për studentët që kërkojnë një program multi-disiplinar, që përfshin psikologjinë, sociologjinë, ligjislacionin social, të drejtat e njeriut dhe metoda të punës sociale si puna me familje, grupe të margjinalizuara dhe komunitetin. Ky kurrikulum gjithëpërfshirës u ofron studentëve dije të thellë dhe aftësi praktike për të përmbushur kërkesat e fushës.

Studimet në këtë departament janë të rëndësishme për zhvillimin e drejtësisë sociale, fuqizimin e komuniteteve, dhe ndërtimin e një shoqërie të qëndrueshme. Programi ndjek misionin e universitetit për përgjegjësinë sociale dhe thekson njohuritë teorike e praktike për t’u përgatitur studentët për t’u përballur me sfida sociale në Kosovë dhe më gjerë. Ky program është i lidhur me praktikat dhe standardet ndërkombëtare, duke u ofruar studentëve një perspektivë globale ndërsa adreson nevojat lokale.

Të diplomuarit nga programi i Punës Sociale janë të përgatitur për punësim në Qendrat për Punë Sociale, organizata qeveritare dhe jo-qeveritare që ofrojnë mbështetje për mbrojtjen e fëmijëve, shërbime për të rinjtë, përkujdesje për të moshuarit, dhe mbështetje për personat me nevoja të veçanta. Ata mund të punojnë në institucione korrektuese dhe rehabilituese, strehimore për viktimat e dhunës në familje, dhe organizata avokuese për të drejtat e njeriut dhe ndryshimin social. Komponentja praktike e kurrikulumit në semestrin e gjashtë u jep studentëve përvojë të drejtpërdrejtë, duke përforcuar gatishmërinë e tyre për të shërbyer në rolet e ndryshme të punës sociale.

Departamenti i Punës Sociale ofron një kurrikulë të strukturuar mirë për nivelin Bachelor, e cila është riakredituar deri më 30 shtator 2029 dhe kombinon trajnimin teorik dhe praktik. Kurrikula përfshin lëndë të ndryshme si menaxhimi i rasteve, këshillimi dhe shkencat sociale të aplikuara, të gjitha të mësuara nga profesorë me përvojë. Struktura e programit siguron përgatitjen e studentëve në aspektin teorik dhe praktik, duke përfunduar me 180 ECTS kreditë në diplomim.

Departamenti promovon shkëmbimin akademik ndërkombëtar, duke zgjeruar përvojat e të nxënit përmes bashkëpunimeve Erasmus+ me institucione si Universiteti i Shkencave të Aplikuara Hanze në Holandë, Universiteti Vives në Belgjikë dhe Universiteti Savonia në Finlandë. Këto partneritete u ofrojnë studentëve mundësinë për të përfunduar një semestër jashtë vendit, duke përfituar nga perspektivat ndërkombëtare në praktikat e punës sociale.

Në semestrin e gjashtë, studentët kryejnë një praktikë profesionale 15-javore, të mundësuar nga marrëveshjet e bashkëpunimit me Departamentin e Politikave Sociale dhe Familjare (DPSF), Qendrat për Punë Sociale, organizatat e shoqërisë civile, dhe institucione të tjera. Këto bashkëpunime u mundësojnë studentëve zhvillimin e aftësive praktike, zgjerimin e rrethit profesional dhe përfshirjen aktive në eksperiencën praktike në institucione të ndryshme të komunitetit.

Departamenti ofron trajnime jashtëkurrikulare për zhvillimin e aftësive të buta dhe organizon aktivitete të rregullta si konferenca, simpoziume dhe punëtori. Grupi Alumni i Punës Sociale gjithashtu ofron mundësi për zhvillim profesional, përfshirje në hulumtime dhe projekte komunitare, si dhe mbështetje në aspektin akademik dhe të karrierës.

Departamenti i ofron studentëve burime akademike kryesore, përfshirë doracakë dhe botime të rëndësishme në fushën e punës sociale. Gjithashtu, është krijuar platforma online PunaSociale.info. Platforma ndihmon zhvillimin profesional të punëtorëve socialë, duke ofruar trajnime dhe bashkëpunim ndërmjet akademisë, profesionistëve të shërbimeve sociale, dhe politikë-bërësve.

Departamenti drejtohet nga Prof. Ass. Dr. Avdyl Gashi, ndërsa sekretare e departamentit është Ass. Rita Selimi. Stafi akademik përbëhet nga pesë anëtarë të dedikuar:

1. Prof. Dr. Lulzim Dragidella
   Linku i profilit
2. Prof. Asoc. Dr. Vjollca Krasniqi
   Linku i profilit
3. Prof. Ass. Dr. Njomza Llullaku
   Linku i profilit
4. Prof. Ass. Dr. Avdyl Gashi
   Linku i profilit
5. MA Ass. Rita Selimi
   Linku i profilit

Programi BA në Punë Sociale ka për mision të përgatisë punonjës socialë të aftë për të përmbushur nevojat dhe të drejtat e individëve, grupeve dhe komuniteteve në Kosovë. Misioni, në përputhje me Planin Strategjik të Fakultetit Filozofik, integron hulumtimet sociale, bashkëpunimin akademik dhe një qasje të përqendruar te studentët. Ky objektiv është thelbësor për ndërtimin e dijes dhe fuqizimin e komuniteteve në funksion të zhvillimit të qëndrueshëm shoqëror.

Departamenti gjithashtu ka realizuar kursin e përbashkët COIL në bashkëpunim me Shkollat e Punës Sociale në Zvicër, i cili u ka ofruar studentëve njohuri ndërkombëtare dhe përfundim me sukses të këtij kursi u ka sjellë studentëve 4 ECTS nga Universiteti i Shkencave të Aplikuara në Zvicër.

Në kuadër të planeve për zgjerim, departamenti synon të ofrojë edhe nivelin Master në Punë Sociale brenda Fakultetit të Filozofisë. Gjithashtu, përmes projekteve Erasmus+ dhe strategjisë së “ndërkombëtarizimit në shtëpi,” departamenti synon të avancojë edukimin dhe praktikat e punës sociale në përputhje me standardet bashkëkohore ndërkombëtare dhe kërkesat shoqërore lokale.

Programi i studimit BA Punë Sociale 2024-2029